उदगीर : कोरोनाचा प्रभाव टाळण्यासाठी ग्रामीण भागातील शाळांना शिल्लक असलेला पोषण आहार वितरित करण्याचे आदेश शासनाने दिले आहेत. परंतु यामध्ये केवळ ग्रामपंचायत क्षेत्रातील विद्यार्थ्यांना याचा लाभ मिळत आहे. शहरी भागातील विद्यार्थी यापासून वंचित राहत आहेत. शासनाने याची दखल घेऊन पालिका व नगरपंचायत क्षेत्रातील विद्यार्थ्यांना याचा लाभ मिळवून देण्याची मागणी पालकांकडून होत आहे.
जिल्हा परिषदेच्या प्राथमिक विभागातील शिक्षणाधिकाऱ्यांनी काढलेल्या आदेशानुसार ग्रामीण भागातील जि.प. व खासगी शाळेतील विद्यार्थ्यांना वाटप केले जात आहे. हे करीत असताना सोशल डिस्टंसिंगचा वापर केला जात आहे.
नगर परिषद व नगरपंचायत क्षेत्रातील हजारो विद्यार्थी पोषण आहारापासून वंचित आहेत. सध्या कोरोनासाठी सुरू असलेल्या लॉकडाऊनमुळे शहरी भागातील कष्टकरी व गरिबांवर बेरोजगारीची कुऱ्हाड कोसळली आहे. त्यांच्या पाल्यांनादेखील पोषण आहार मिळणे गरजेचे असल्याने शासनाने सुधारित आदेश काढण्याची मागणी होत आहे.
